2016 JENEROL ELEKSEN

POLISI PLATFOM BLONG GRAON MO JASTIS PATI (GJP) 2016 JENEROL ELEKSEN

BIGFALA TINGTING

1. Gohed blong soemaot stret fasen blong save mekem gudfala lidaship olsem wan MP mo wan nasonal lida.
2. Jenisim Konstityusen mo ol loa blong stopem politikol instabiliti mo enkarejem ol gudfala fasen blong mekem politik (“political reform”)
3. Leftemap jastis sistem blong enfosem ol loa blong kantri – mekem se evriwan i mas folem loa
4. Promotem “gud gavenens” mo “transparensi” blong save katem daon korapsen
5. Givim stret badjet long Malvatumauri, Dipatmen blong Lands mo Kastom Land Manejmen Ofis blong save implimentem land rifom we yumi bin mekem finis
6. Mekem riviu long pablik sevis blong mekem ol wokman blong Gavman i kam moa efektiv mo prodaktiv
7. Leftemap agrikalja, “food processing” mo “value adding” olsem stampa blong ekonomik divelopmen
8. Leftemap helt blong populesen thru long stret kakae, moa sports aktiviti mo wan gudfala helt sevis
9. Mekem riviu long edukesen sistem blong leftemap standad blong edukesen
10. Mekem se Gavman i spendem mane long wan fasen we i stret folem intres blong pablik, mo yumi evriwan i save long hem

GJP HEMI ONLI POLITIKOL PATI LONG VANUATU WE I STAP PROMIS MO I STAP MEKEM FINIS OLGETA SAMTING IA:

Yusum kraeteria blong jusum ol kandidet blong hem: evri kandidet blong GJP oli mas gat (1) longfala histri blong mekem fri sevis blong givhan long komuniti blong olgeta, mo (2) nogat eni histri blong misyusum mane long eni wok we oli holem o long level blong komuniti. GJP Eksekutiv i skrinim evri kandidet blong mek sua se oli ol stret lida we oli fitim kraeteria ia bifo oli save kam wan kandidet blong pati.
Karemaot 2 million vatu long salari blong MP mo ademap wetem alokesen mo yusum evri mane ia blong mitim ol nid blong komuniti mo mekem ripot blong hem afta. MP mo komiti blong hem bae oli no kontrolem alokesen - bae Eksekutiv blong Pati nomo i risivim ol rikwes we komiti blong MP i apruvum mo givimaot mane folem ol rikwes ia. Eksekutiv bae i rikodem evri mane we hemi givimaot, mo long stat blong evri yia bae i putumaot wan ripot blong spending blong alokesen blong MP long las yia olsem wan posta we bae oli save hangem long evri ples long konstituensi. Fasen ia, evri MP blong GJP oli stap mekem finis long las 4-yia term
Sapotem edukesen blong ol pikinini long evri konstituensi we i gat MP long hem wetem 1,000,000 vatu evri yia aot long alokesen blong MP. Bae yumi no helpem ol pikinini blong ol sapota nomo be bae yumi givhan long ol pikinini we oli gat gudfala mark mo faenansol o spesel nid. Fasen ia, evri MP blong GJP oli stap mekem finis long las 4-yia term
Vot agensem eni tingting o bil blong inkrisim salari blong ol MP blong ful 4-yia term blong nekis Palemen, be sapotem tingting blong leftemap MP alokesen. Fasen ia, GJP i stap mekem finis long las 6 yia
Wok insaed long eni Ministri we GJP i holem blong jenisim evri loa we i givim janis blong wan Minista i save givim wok o skolaship o posisen folem politik. Polisi blong GJP hemi blong mekem se evri apoenmen blong wok long wan pablik ofis hemi mas folem kraeteria, mo blong mekem se i no save gat politikol inteferens long fasen blong givimaot ol skolaship, long save go insaed long wan skul, long ol posting blong tija mo nes, etc

JENISIM KONSTITYUSEN MO OL LOA BLONG STOPEM POLITIKOL INSTABILITI MO ENKAREJEM OL GUDFALA FASEN BLONG MEKEM POLITIK (“POLITICAL REFORM”)

Jenisim Konstityusen blong:

1. karemaot raet blong ol MP blong save jenisim pati o krosem floa blong Palamen olsem we oli wantem
2. katem daon hamas mosen blong nogat trast i save gat long wan term blong Palamen, mo mekem fasen blong putum wan mosen blong nogat trast i kam moa strong (eksampol, mekem se 27 MP mas saenem mosen long fored blong Spika long ofis blong hem)
3.putum kraeteria long ol naturalized sitisen we oli wantem kontest
4. karemaot paoa blong wan minority gavman i save askem Presiden blong disolvem Palamen
Pasem wan niufala loa blong:

1. putum kraeteria blong save stanemap wan niu politikol pati
2. mekem se ol politikol pati i mas talemaot se oli kasem mane blong olgeta wea
3. putum kraeteria blong hamas sapot wan politikol pati o wan indipenden kandidet i mas gat blong save kontestem wan eleksen
Jenisim Representation of the People Act blong putum moa kraeteria blong wan man o wan woman i save stanap olsem wan kandidet long wan eleksen
Mekem sistem blong rejistresen blong vota i kam moa gud, blong givim moa janis long ol pipol i save rejista blo vot, mo blong katem daon ol kruked fasen blong vot
Jenisim Representation of the People Act blong mekem se taem wan MP i lusum jea blong hem, “runner up” blong hem long las eleksen otomatikli bae i tekem jea ia (stopem nid blong gat by-eleksen)
Jenisim Representation of the People Act long saed blong ol eleksen blong putum ol klia rul long wanem hemi wan “kampen”, wanem wan “caretaker” Gavman i save mekem, mo hao wan propos kandidet i save givim samting long ol vota
Stat blong mekem riviu long lo mo ol konsaltesen wetem pablik long tingting blong:
1. sherem gud bakagen ol jea blong ol MP folem populesen mo namba blong aelan long wan-wan konstituensi
2. brekem ol bigfala konstituensi wetem fulap jea i go long ol wan-wan smol konstituensi (olsem Tanna, Efate, Santo, Malakula)
Pasem niufala Standing Oda blong Palemen we i redi finis
Pasem wan loa blong mekem se evri MP i mas mekem ripot long spending blong alokesen blong olgeta
Mekem ol “Temporary Special Measure” blong risevem one-third blong ol jea long evri Provinsel Kaonsel blong ol woman
Jenisim evri loa we i givim janis blong wan Minista i save givim wok o skolaship o posisen folem politik: blong mekem se evri apoenmen blong wok long wan pablik ofis hemi mas folem kraeteria, mo blong mekem se i no save gat politikol inteferens long fasen blong givimaot ol skolaship, blong entrens long wan skul, long ol posting blong tija mo nurs, etcPasem wan niufala “Executive Power Act” blong talem stret wanem ol disisen we wan Praem Minista mo wan Minista i save mekem, mo wanem ol disisen we Kaonsel blong Minista nomo i save mekem (blong putum limit long disisen we wan PM o wan Minista i save mekem withaot apruvel blong Kaonsel)

LEFTEMAP JASTIS SISTEM BLONG ENFOSEM OL LOA BLONG KANTRI MO PROMOTEM “GUD GAVENENS” MO “TRANSPARENSI” BLONG SAVE KATEM DAON KORAPSEN

Stanemap ‘nasonal integriti komiti’ we i gat insaed ol reprisentetiv blong Gavman mo ol NGO blong kodinetem implimentesen blong ol rekomendesen blong 2014 Vanuatu nasonal integriti ripot, mo givim wan badjet long olgeta blong mekem wok
Leftemap wok blong Polis long saed blong “criminal investigation”
Gohed blong impruvum “computerized case management system” blong givhan long Polis, Pablik Prosekyuta, ol Kot mo pablik blong save manejem gud ol kes
Wok wetem Judiseri blong spidimap fasen we hemi stap dil wetem ol kes
Putum evri staf we Judicial Services Commission i stap rekomendem apoenmen blong olgeta long Pefomens Kontrakt (olsem Atoni Jenerol, Pablik Prosekyuta, Pablik Solisita mo Ombudsman)
Jenisim Ombudsman Act mo Leadership Code Act blong leftemap paoa blong Ombudsman blong panisim ol lida we oli brekem Leadership Code
Leftemap bajet mo wok blong Odita Jenerol, blong hemi save mekem gud wok we Konstityusen i givim long hem
Mekem wan ful investigesen mo odit long evri State Owned Enterprises olsem NISCOL mo AVL mo prosekyutum eni man we i stilim mane long ol kampani ia
Mekem se Radio Vanuatu i mas rijim evri aelan blong Vanuatu
Stanemap Vanuatu Nasonal Media Kaonsel blong givimaot ol brodkas laesens blong mekem radio o TV (karemaot wok ia long VBTC)
Pasem loa blong “Freedom Of Information” we Gavman i stap wok long hem naoia
Pasem wan loa blong protektem ol “whistle blowers” we oli wok long Gavman (blong protektem ol wokman blong Gavman we oli ripotem korapsen insaed long Gavman)
Karemaot paoa blong Polis Komisina mo Minista blong Intenol Afeas blong mas apruvum ol maj o demonstresen: wan grup we i wantem mekem maj i mas talemaot nomo long Polis blong oli save mekem sikiuriti long maj

GIVIM STRET BADJET LONG MALVATUMAURI, DIPATMEN BLONG LANDS MO KASTOM LAND MANEJMEN OFIS BLONG SAVE IMPLIMENTEM LAND RIFOM WE YUMI BIN MEKEM FINIS

Implimentem fulwan ol niufala loa blong graon we GJP i pasem finis long Palamen we oli fulfilim ol resolusen blong Land Samit mo protektem gud ol kastom graon blong Vanuatu folem ol tingting blong Konstityusen. Ol niufala loa blong graon i mekem ol samting ia:
1. Karemaot paoa blong Minista blong saenem lis long bihaf blong ol kastom ona sipos ol kastom ona oli no agri
2. Mekem se fasen blong mekem lis hemi moa fea long ol kastom ona mo i gat tingting blong ol kastom ona insaed blong mekem se bae i save gat ol divelopmen we oli moa gud mo oli moa sastenebol long Vanuatu
3 Protektem State Land (graon blong Gavman)
4. Mekem se yumi mas aedentifaem ol stret kastom ona folem ol stret rul blong kastom; hemia long nakamal mo long “custom area land tribunal”
5. Mekem se ol disisen blong ol nakamal mo ol “custom area land tribunal” long saed blong onaship blong kastom graon oli gat paoa mo i no save gat apil long olgeta i go long kot (yu save apil long proses nomo i go lo Aelan Kot)
6. Mekem se Palemen i mas ‘consult’ o askem tingting blong Malvatumauri sipos hemi wantem jenisim ol loa blong graon bakagen (amendment blong artikol 30 blong Konstityusen)
Stanemap wan ofis blong givim ligol, faenansol mo bisnis advaes long ol lanona long saed blong hao oli save yusum graon blong olgeta
Amendem Valuation of Land Act blong givim paoa long Valuer General blong mekem odit long ol lis we oli stap finis mo putum stret valiu blong olgeta, mo mekem se lessee i mas stat blong pem rent folem stret valuesen ia
Pasem mo enfosem Waste Management Regulation mo Pollution Control Regulation; leftemap badjet blong Dipatmen blong Envaeronmen blong save enfosem ol loa blong protektem envaeronmen
Mekem ol “Physical Plan” blong evri aelan folem land-yus planing we i stap finis
Pasem wan loa blong sabdivisen blong mekem se i gat ol “minimum standard” blong olgeta we oli wantem mekem ol sabdivisen long saed blong spes blo wan-wan graon, stret infrastrakja (olsem rod, wota saplae mo laet) mo ol grin spes mo ol spes blong ol komuniti fasiliti olsem skul, etc
Protektem ol las grin spes long Port Vila mo Luganville
Givim moa graon long Port Vila mo Luganville long han blong komuniti, blong komuniti i save yusum blong grin spes o blong bildim ol market o ples blong miting long hem
Mekem wan investigesen blong ol land diling we i involvem ol staf blong Dipatmen blong Land mo ol foma Minista mo politikol apoenti blong faenemaot sipos i gat fraud o “improper process” long fasen blong givimaot ol lis long intres blong olgeta nomo

MEKEM SE BADJET BLONG GAVMAN I MAS LUK LONG OL “BASIC NEEDS” FASTAEM

Ri-aloketem nasonal badjet blong praeoritaesem olgeta “basic needs” ia:
1. evri komuniti long Vanuatu i mas gat sef wota saplae
2. setemap gudfala sistem blong mentenem rod long evri aelan
3. fiksimap gud bakagen evri Gavman fixed asset (haos blong polis, haos blong tija, ol helt fasiliti, ol skul, ol gavman ofis, etc). Hemia i minim tu se bae Gavman i mas stretem isiu blong sam blong ol graon we ol asset ia i stap long hem
4. ekstendem skul fi sabsidy kasem yia 8
Katem daon kost blong trak mo fuel:
1. Salem evri trak blong Gavman, be livim nomo 2 trak blong wan-wan Ministri (cabinet) mo 2 trak blong wan-wan dipatmen (PM nomo bae i gat 1 trak bakagen blong sikuiriti bak-ap); mo livim tu ol trak blong sam “essential services”
2. SG blong wan-wan Provins bae hemi bos blong evri trak blong Gavman long Provins
Putum moa kontrol long intanasonal travel we Gavman i pem
Stat blong yusum sistem blong “gender budgeting” blong luksave hamas pablik fand Gavman i stap spendem long nid blong ol woman
Stat blong yusum sistem blong “island-based budgeting” blong luksave hamas pablik fand Gavman i stap spendem long wan-wan aelan

KATEM DAON KOST BLONG OL POLITISEN MO GAVMAN

Mekem se bae i nogat eni inkris long ol salari blong ol MP blong ful 4-yia term blong nekis Palemen
Karemaot (ripilim) loa we i givim Gavman “pension” long ol olfala Praem Minista, Presiden mo Presiden blong Malvatumauri blong ful laef blong olgeta
Ripilim evri niufala benefit mo politikol staf posisen we foma PM Sato i bin krietem
Katem namba blong ol politikol staf long wan Ministri i go long 9 (naoia hemi 18), mo mekem ful riviu blong ol benefit anda long Official Salaries Act
Lukluk long evri samting we Gavman i spendem mane long hem, afta katemaot ol samting we i nogat tumas nid long hem
Mekem se Ofis blong Praem Minista i mas apruvum evri ovasi trip we Gavman i pem, blong kontrolem mo katem daon vatu we Gavman i spendem long ol ovasi trip
Putum praeoriti long sheftem ol Gavman ofis we i stap rent naoia long ol praevet bilding i go long ol bilding we Gavman i ownem. Bae i nid blong fiksimap ol Gavman bilding blong mekem hemia, mo tu yusum niufala Convention Centre

LUKLUK BAK LONG REVENIU KOLEKSEN SISTEM BLONG GAVMAN

(Dipatmen blong Customs, Rates and Taxes) blong mekem i kam moa strong mo i save kolektem evri tax we evriwan i mas pem folem loa

MEKEM RIVIU LONG PABLIK SEVIS BLONG MEKEM OL WOKMAN BLONG GAVMAN I KAM MOA EFEKTIV MO PRODAKTIV

Mekem wan indipenden riviu long Public Service Act mo strakja blong pablik sevis mo jenisim loa mo strakja ia blong mekem wok blong ol wokman blong Gavman i kam moa efektiv mo prodaktiv
Lukluk long hao blong mekem ol defren komisen blong ol wokman blong Gavman (Public Service, Police Service, Teaching Service, etc) oli wok moa gud tugeta
Jenisim Government Act blong karemaot posisen blong ol Daerekta Jeneral
Putum evri pablik seven long pefomens kontrakt, mo leftemap sistem blong save monitarem gud wok mo pefomens blong olgeta
Mekem se oltaem i mas gat “in service” training blong evri wokman blong Gavman, inkludum ol tija mo ol helt woka
Mekem se Gavman i pemaot yia blong evri wokman blong hem (“severance pay”) long en blong evri yia
Divelopem wan nasonal “Human Resource Plan”
Mekem se evri pablik seven mo elekted ofisel (olsem MP) i mas gat wan helth jek evri yia

LEFTEMAP STANDAD BLONG EDUKESEN

Stanemap wan Nasonal Taskfos long saed blong Edukesen blong daerektem wok blong jenisim mo leftemap ful edukesen system
Stretem salari skel blong ol tija blong luksave olgeta we oli gat hae kwalifikesen mo leftemap namba blong ol kwalifae tija insaed long klasrum
Pemaot ol aotstanding salari mo severens pei blong ol tija
Stat blong lukluk blong pem ol kwalifae pri-skul tija
Ekstendem skul fi sabsidy kasem yia 8
Implimentem fulwan niufala nasonal kerikulum folem “Nasonal Kerikulum Visen Stetmen”, we i gat insaed kastom save, Kristien prinsipol, “civic” edukesen, agrikalja, bisnis, etc
Mekem edukesen sistem i tijim fulap lanwis folem wanem we Nasonal Lanwis Polisi blong Nasonal Lanwis Kaonsel i talem. Tijim pikinini blong save rid mo raet long lanwis we hemi stap toktok long hom blong hem, blong leftemap literisi mo kaljoral aedentiti
Mekem se program blong ol Anglophone mo Francophone studen hemi “equivalent” long saed blong hamas yia oli mas mekem long sekonderi bifo oli save go long univesiti
Mekem se ol skolaship we Gavman i stap givim i stret long “cost of living” long ol defren kantri we ol studen i stap long hem
Putum wan kondisen long ol studen we oli kasem Gavman skolaship blong oli mas go wok long wan rurol eria blong 1 yia afta we oli graduet
Mekem se i gat moa “tertiary” o univesiti program we ol studen i save mekem insaed long Vanuatu nomo
Leftemap ol USP program long Emalus Campus mo long ol USP sab-senta long ol Provins, mo enjkarejem moa sekonderi skul blong yusum USP Preliminary mo Foundation program
Leftemap namba blong ol defren kaen teknikol o “skills” program we TVET, VIT mo VRDTCA i stap tijim
Sapotem VRDTCA blong leftemap wok mo namba blong ol rurol trening senta; spidimap “certification” blong ol VRDTCA kos wetem Nasonal Qualifications Authority
Pasem wan loa blong putum “apprenticeship” sistem long Vanuatu, blong ol kampani i mas karem ol yangfala we oli kamaot long VIT mo ol RTC blong wok blong wan short taem blong givim ekspiriens long olgeta
Sapotem ol NGO mo ol jioj blong givhan long ol bigfala man mo woman blong save rid mo raet (“adult literacy”)

LEFTEMAP STANDAD BLONG HELT

Mekem se evri komuniti long Vanuatu i mas gat sef wota saplae
Leftemap badjet blong “primary health care” i kasem sem level olsem “curative health care”, blong yumi evriwan i save jenisim ol fasen blong yumi blong daonem ol sik
Stopem ol rabis kakae blong kam insaed long Vanuatu, mo promotem moa ol lokol kakae. Putum tax long ol imported kakae we oli spoelem helt blong yumi mo yusum mane ia blong promotem lokol kakae
Rivuim bakagen afta implimentem propos niu strakja blong Ministri blong Helt blong 2010-2011
Pemaot ol aotstanding salari mo severens pei blong ol helt woka
Fiksimap gud bakagen evri Gavman helt fasiliti mo bildim ol niufala fasiliti long ples we i nogat helt fasiliti kolosap, mo putum ol stret tul blong wok long olgeta. Hemia stat long Port Vila Central Hospital mo Northern District Hospital kam daon long ol Provinsel Helt Senta, ol Dispenseri mo ol Aid Post
Mekem se evri Gavman helt fasiliti i mas gat stret staf blo hem:
1. Gohed blong trenem fulap niufala nurs mo dokta
2. Mekem se ol nurs mo dokta we oli stap naoia oli mas mekem “in-service training” mo “further education” blong leftemap save mo kwalifikesen blong olgeta
3. Leftemap save mo “skills” blong ol Vilej Helt Woka blo oli save mekem moa helt sevis (eg, givim stik blo TB) mo stat blo givim smol alaoens long olgeta
Mekem wan spesel badjet evri yia blo sendem ol sik pipol blong karem ol spesel medikol tritmen ovasi we i nogat long Vanuatu

PROMOTEM NI-VANUATU INSAED LONG BISNIS

Longfala eim: Blong balansem lokol mo foren onaship blong vatu ekonomi blong save gat nasonal ekonomik sikiuriti mo ekonomik indipendens. Ol step blong mas mekem:

a) Ni-Vanuatu i ownem 30% blong vatu ekonomi long 2020

b) Ni-Vanuatu i ownem 67% blong vatu ekonomi long 2050.

Jenisim Nasonal Invesmen Polisi, loa blong VIPA mo ol narafala loa blong save ajivim longfala eim ia
Karem i kam lo Vanuatu ol gudfala investa nomo we oli gat “reputation, capital mo experience”, mo ol projek we oli fit gud wetem laef blong man ples
Putumbak mo enfosem loa mo polisi we i stap finis long saed blong “reserve list” blong ol bisnis we ni-Vanuatu nomo i save mekem mo ademap sam niufala sekta i go insaed risev lis
Mekem se eni niu foren invesmen long kantri i mas bi wan joen ventja, we ni-Vanuatu i ownem 50%
Stopem eni niu foren-owned retail mo wholesale shop, mo kontrolem olgeta we oli stap finis
Tanem tingting blong turism divelopmen i go blong promotem turism long saed blong envaeronmen mo kastom long rurol eria we ol man ples i ownem
Sapotem mo promotem ol “micro-credit” skim olsem blong VANWODS mo blong NBV
Pasem wan loa se 40% blong ol infomesen o program we wan lokol media kampani hemi givimaot oli mas mekem long Vanuatu nomo o hemi mas bi abaot Vanuatu (promotem ol lokol artis mo lokol prodaksen)
“Suspendem” o stopem fastaem MSG Tred Agrimen mo MSG “Skills Movement Scheme” mo mekem moa toktok o konsaltesen wetem ol pipol blong Vanuatu blong luk sipos oli wantem ol agrimen ia o no
Stopem evri negosiesen blong joenem PACER+, EPA mo eni narafala intanasonal tred agrimen kasem taem we yumi skelem gud ol agrimen ia long saed blong wanem bae oli save mekem long yumi long saed blong ekonomi, sosel laef mo envaeronmen blong yumi

LEFTEMAP AGRIKALJA, “FOOD PROCESSING” MO “VALUE ADDING” OLSEM STAMPA BLONG EKONOMIK DIVELOPMEN

Stanemap bakagen ful agrikalja ekstensen sevis (olsem we i stap bifo), wetem stret infrastrakja, badjet, staf mo manejmen
Stat blong planem bak evri plantesen blong kokonas mo kakao
Protektem mo planem moa ol lokol frut mo nat tri blong yumi (olsem nangae, tamanu, etc), mo planem moa ol timba tri blong yumi (olsem waetwud mo had wud), mo planem moa sandalwud
Stanemap bakagen “small-holder cattle project” (blong ol buluk) mo sapotem thru long ekstensen sevis
Sapotem ol smol-skel fishing projek blong save putum moa fresh fish lo lokol market
Sapotem ol projek blong pig mo faol blong save putum moa pig mo faol lo lokol market
Mekem ol stret nasonal manejmen plan blong ol defren kaen samting blong solwora we yumi stap kakae mo yusum (fish, lobsta, beche-de-mer, etc)
Promotem polisi blong mas mekem 3 garen: wan blong kakae, wan blong salem mo wan blong kastom mo seremoni
Stopem yus blong ol kemikel long agrikalja mo diklerem Vanuatu wan kantri we kakae blong hem i “100% organic” (nogat kemikel long hem)
Long saed blong infrastrakja divelopmen (olsem ol rod mo ol wof), givim praeoriti long ol projek we i sapotem agrikalja
Mekem se Gavman i lisim sam bigfala graon long ol defren aelan mo sab-lisim long ol farma we oli wantem mekem “large-scale commercial agriculture”
Mekem se yumi mas prosesem ol lokol kakae blong yumi: givim spesel Gavman sapot long ol “value-adding food industries” thru long “marketing”, “branding” mo yus blong “geographical indication”
Givhan long ol fama mo ol prodyusa blong targetem ol “high value niche market” blong ol prodak blong yumi
Gazetem ripil blong VCMB Act afta yusum “cess tax” blong setemap wan pension skim blong ol farma we oli exportem ol agrikalja prodakt (olsem VNPF)
Stanemap wan nasonal food laboratory
Gavman blong lidim wan nasonal program blong “Buy Vanuatu Made” mo “Kakae Aelan Kakae”
Mekem ol Provinsel Agrikalja Show evri 1 o 2 yia
Mekem se Gavman i yusum lokol kakae nomo long evri fanksen blong hem

PROMOTEM “RENEWABLE ENEJI”

Divelopem ol stret teknoloji blong save mekem benzin long kokonas (mo ol narafala samting), mo blong save mekem elektrisiti yusum san (solar) mo riva (micro-hydro)
Vanuatu Institut blong Teknoloji mo ol Rurol Trening Senta blong givim trening long saed blong mekem benzin long kokonas (mo ol narafala samting), mo blong stanemap mo mentenem ol masin mo ol enjin blong tanem kokonas i kam long oel mo benzin, mo blong mekem elektrisiti yusum solar mo micro-hydro

GIVIM MOA PAOA LONG MALVATUMAURI MO PROMOTEM KASTOM

Leftemap bajet mo wok blong Malvatumauri blong hemi save mekem stret wok blong hem olsem wan Konstityusenel bodi
Malvatumauri mo ol Provinsel Gavman Kaonsel blong stretem mo maredem strakja blong olgeta
Setemap mo rejisterem ol kaonsel blong jif long vilej, sab-eria, eria mo aelan level, mo givim sapot blong leftemap wok mo rol blong ol jif kaonsel ia blong givhan long Gavman blong mekem sevis deliveri
Gohed blong mekem mo yusum ol niufala fasen blong meserem ekonomi, blong luksave kastom ekonomi mo kwaliti blong laef
Stat blong mekem ol Provinsel mo Nasonal Arts Festivol bakagen evri 4 yia (stat lo 2018)

MEKEM DISENTRALAESESEN

Stat blong pemaot ol graon long evri Provinsel Senta blong mekem i kam pablik land
Stat blong muvum ol hed ofis blong ol Dipatmen blong Gavman i go long ol aelan
Stat blong implimentem ol rekomendesen blong Disentralaesesen Komisen Riviu ripot blong 2009. Wan blong ol rekomendesen ia hemi blong stopem sistem blong Provins mo gobak long system blong ol Lokol Gavman Kaonsel blong wan-wan aelan
Yusum E-Government netwok blong disentralaesem ol sevis blong gavman olsem blong karem paspot, birth setifiket, etc, blong ol man aelan i nomo nid blong kam long Vila blong karem ol sevis ia

PROMOTEM “DECENT WORK”

Mekem se “Tripartite Labour Advisory Council” i hariap blong finisim wok blong hem blong agri long ol niufala jenis long ol leba loa blong yumi (Employment Act, Trade Unions Act, Trade Disputes Act mo Minimum Wage and Minimum Wage Bord Act); givhan long Council wetem wan badjet
Jenisim loa blong givim moa proteksen long ol ni-Vanuatu blong karem wok long Vanuatu (be i no ol forena)
Leftemap wok blong Dipatmen blong Leba blong mekem se hemi save enfosem ol loa long saed blong wok
Mekem se moa man mo woman Vanuatu i save gat janis o opotuniti blong go long RSE skim blong Niu Silan mo Australia, mo leftemap benefit we ol Ni-Vanuatu i stap karem aot long skim ia

OL SPESEL POLISI BLONG PORT VILA MO LUGANVILLE

Ekstendem Munisipol baondri blong Port Vila mo Luganville. Gavman blong pemaot ol graon long ol kastom ona blong mekem i kam pablik lan mo letem blong ol famli mo ol komuniti long tufala taon ia we oli nogat graon yet blong oli save pem sloslo (artikol 81 blong Konstityusen hemi tokbaot hemia long saed blong kastom graon)
Pasem wan “National Building Code” wetem ol defren standed kondisen blong ol defren kaen haos. Mekem ol “minimum standard” blong olgeta we i mekem rent haos blong mekem sua se i gat gudfala living space, wota saplae, sanitation, mo helti kondisen blong ol tenant i liv long hem, mo setemap ol “standard rental rate” we wan landlord i save chargem folem kaen housing we hemi providem. Mekem se i mas gat “wheelchair access” long evri pablik bilding
Stanemap wan land rent sistem we i putum defren land rent folem saez blo haos mo graon
Putum wan niufala loa blong pablik transpot sekta blong leftemap standad, givim moa benefit long ol operata mo kontrolem praes. Sam tingting i olsem: Nomo givim eni niu laesens blong bas o taxi long Port Vila; Mekem ol kondisen mo standad we evri bas mo taxi i mas folem blong holem wan laesens, mo givhan long ol bas mo taxi blong kasem ol standad ia; Givim jip praes blong benzine mo spare parts long ol bas mo putum praes blong bas i kam daon long 100 vatu bakagen; Lukluk blong stanemap ol spesel “insurance mo savings” skim blong ol operata; Stanemap ol “designated routes” blong ol bas, blong sam bas i mas ron long ol sem rod ia oltaem; Mekem sam spesel bas mo taxi we i save karem wheelchair

OL NARAFALA SOSEL ISIU

Sapotem mo givim inaf risos blong wok long ol stampa tingting blong Nasonal Populesen Polisi blong 2011-2020
Setemap bakagen “Price Control Unit” blong kontrolem ol praes blong ol samting, mo statem proses blong stanemap wan “Consumer Guarantees Act” blong protektem raet blong ol consumer
Putum ej we yu save karemaot vatu blong yu long VNPF i kam daon long 45
Givim “duty exemption status” i go long ol NGO o “charity” we oli wok wetem ol disadvantej grup olsem ol disebol pipol

FOREN POLISI

Wok wetem ol kantri long saed-saed blong yumi (Solomon Islands, Fiji, Nouvelle-Caledonie mo Australia) blong stanemap ol “maritime boundaries” blong yumi. Tekem kes blong Matthew mo Hunter i go intansonal kot sipos Franis i no agri blong givim ol aelan ia long yumi
Katem diplomatic rilesen wetem Indonesia mo stat toktok strong long evri organaesesen long intanasonal level (eksampol, MSG, Pasifik Aelan Forum, Unaeted Nesen) mo tu long ol narafala kantri (bilateral level) blong sapotem indipendens blong West Papua
Leftemap moa ekonomik mo sosel rilesensip wetem ol “neighbour” kantri blong yumi Nouvelle-Calédonie, Solomon mo Fiji
Holem taet mo bildimap RSE skim wetem Niu Silan
Wok kolosap wetem Gavman blong Ostrelia blong leftemap namba blong ol ni-Vanuatu we oli save go wok long “seasonal labour” long Ostrelia
Lukluk bakagen long nid blong gat ol konsul mo ambasada blong yumi long ol narafala kantri folem hamas mane yumi stap spendem long olgeta, wanem benefit oli karem blong yumi, mo “integrity” blong nem blong Vanuatu ovasi

STRETEM SITISENSHIP

Stopem evri program we i salem paspot blong Vanuatu, olsem CIIP mo PR Program
Mekem wan investigesen mo odit long evri Vanuatu paspot mo kanselem evri paspot we i no mitim rikwaemen blong Konstityusen

PROMOTEM MOA SPORTS AKTIVITI

Givim manejmen blong ol sport fasiliti blong Gavman long Port Vila mo Luganville i go long ol Nasonal Federesen mo ol komuniti. Eksampol long Port Vila: Stade mo Kawenu Fil i go long VFF, Ex-FOL i go long basketbol mo volebol, Freswota Fil i go long VFF mo Freswota Indijenes Kaonsel
Givim manejmen blong ol aelan sports lig mo ol provinsel sports lig i go long ol Nasonal Federesen, mo givhan long ol Nasonal Federesen blong mekem sevis diliveri long saed blong evri sports disiplin i go long evri aelan
Krietem wan niu posisen anda long Ministri blong Edukesen blong wan ‘Zone Sports Edukesen Advaesa’ (ZSEA) blong givhan blong divelopem sports long evri skul (wok blong wan ZSEA bae i kavremap sem eria we wan ZCA i stap wok long hem). Ol Nasonal Federesen i save wok wetem ol ZSEA blong promotem mo divelopem sports insaed long ol skul
Divelopem ol nasonal sports fasiliti blong redi blong Vanuatu i hostem 2017 South Pacific Mini Games